فوبيا الإرتباط

التوتر في بداية العلاقات والخوف من الفشل -كالمعتاد- بيخلينا أحياناً نخسر أشخاص كان ممكن ومحتمل العلاقة معاهم تنجح وتستمر..

هاجس العلاقات الفاشلة اللي مَرّينا بيها في حياتنا بيوصلنا ان يبقى عندنا "فوبيا من الإرتباط" وأول ما تشوف حد يادوبك بيميل ويحدف منديله كاتب على طرفه تجيله -كما قال العندليب- بيبدأ يحصلك تشنجات وإسهال وودانك تتهز زي فؤاد المهندس في فرافيرو لما كان بيسمع أغنية العتبة جزاز..

وتبدأ تفرش مختبر التحاليل العاطفية الخاص بيك وتحط الضحية تحت الميكروسكوب وتتعامل معاه زي فار التجارب بالضبط..

وتجرب عليه كل المواقف السودوية المهببة والمنيلة بنيلة اللي حصلتلك قبل كده وده للتأكد من حُسن نواياه وصدق مشاعره.. وبيصاحبك سوء الظن الأوفر الدائم مع كل أفعاله..

يعني لو ما اتكلمش مرة كل ساعة يبقى نسيني خلاص.. ولو خرج من غير ما يقول يبقى بيخوني.. ولو اتكلم وهو متعصب شوية يبقى عايز ينهي أم العلاقة ويبعتلي دباديبي..

الملفات السابقة مع كل السابقين بتتفتح قدامك وتبدأ المقارنة المستمرة بين العلاقة دي والمرحومين أخواتها اللي انتهوا بفشل ذريع مع بعض الغرز والخدوش والكدمات.

ومن هنا تبدأ علاقة جديدة في الإنهيار بشكل سريع عن اللي قبلها بسبب خيالاتك المريضة وتوقع الفشل ولما تاخد بالك إن العلاقة خلاص بتقولك باي باي و go to hell بتحاول تنقذ ما يمكن إنقاذه لكن بعد ايه يا شاطر فلقد سبق السيف العذل واللي كان معاك محتاج أصلاً كورس علاج نفسي وإعادة تأهيل بعد اللي عملته فيه وربنا يستر وميبقاش زيك كده ويمشي يعقد في خلق الله..

طبيعي انك تفشل مرة واتنين وتلاتة بس من الغباء انك تفضل تفشل طول عمرك بسبب خوفك من الفشل.. إبدأ العلاقة الجديدة كأنها الأولى في حياتك وإردم بزفت وقطران على كل اللي فات..

*ماتخليش تجاربك أشباح بتطاردك طول الوقت.. خليها تجارب تقدر تستفاد من أخطائها علشان ماتكررهاش تاني..