سلوكيات التعامل اليومية

نفسي الناس يبقى عندها ثقافة بسيطة كده في التعامل مع بعض..

-يعني لما تغلط في حد تقوله انا أسف -ده مش عيب على فكرة ولا هتقلل منك بالعكس دي هتكبرك في نظر نفسك وفي نظر اللي قدامك.

-استحمى..

-لما حد يعملك حاجة كويسة أو خدمة تقوله شكراً.

-لما انت تعمل أي حاجة لأي حد ويقولك شكراً -اه والله في ناس بتقولها حقيقي :D - ترد عليه وتقوله العفو او الشكر لله او أي حاجة او ابتسم بس حتى.

-لما حد يقولك صباح الخير ما تقفلوش يومه وتقوله المفروض تقول السلام عليكم -في الحالتين الراجل كتر خيره بيصبح عليك وبيتمنالك كل خير.

وانت بتسلم على الناس بلاش بوس وأحضان كتير، سلم بالإيد وبوستين بس حلوين -ومش شرط البوستين كمان.

-استحمى..

-لما تتعامل مع ناس ماتعرفهاش مش لازم تتكلم بقرف او زهق، مش هقولك خُدهم بالحضن او بُوسهُم.. بس اتعامل معاهم عادي وابتسم أبسط ما فيها مثلاً.

-لما تبقى قاعد جمب واحد وهو ماسك الموبايل او أي حاجة حاول متحطش عينك فيها، بلاش تطفل.

-مفيش حاجة اسمها تطلب من حد انه يوريك موبايله او تمسكه وتقلب فيه، حاول تنسى الفكرة دي نهائي.

-متركزش مع الناس وتفضل باصص ومركز قوي في اللي حواليك وانت متعرفوش.

-خليك في حالك.

-استحمى.. لو مش علشانك يبقى علشان اللي بيتعاملوا معاك.

-اشتري مناديل وخليها في جيبك وتف فيها براحتك..

-لما تخبط على باب تخبط بالراحة متعيش بشخصية المخبر اللي رايح يقبض على حد وابقى خبط وابعد عن الباب شوية.

-بالله عليك يا أخي استحمى..

أول كل حاجة

-انت ايه أحلى حاجة ف حياتك؟

-انا أحلى حاجة في حياتي هي أول كل حاجة في حياتي.

-إزاي أول حاجة ف حياتك هي أحلى أول حاجة ف حياتك؟!

-عادي..

 زي أول كل حاجة..

 زي أول مرة أعيط.. لما يضربني البعاد..

 زي أول مرة أرجع.. ألقى جدي مات ف أوضتي..

 زي أول مرة أبويا كتب لأمي جواب بخطه..

 زي أول مرة أضيع شنطتي وكتبي وحاجاتي..

 زي أول كلام بيوجع أسمعه عشان فلان..

 زي أسئلتي البريئة ليه مشوفتش ربنا..

 زي واجب درس كيميا غبت فيه طول السنة..

 زي أول مرة أشوف اسمي على موبايلك حبيبي..

 زي أول ميت جنية ف مرتبي بتخش جيبي..

 زي أول حضن صامت.. الكلام كان فيه عياط..

 زي صداقتنا العادية لما قلبت بإرتباط..

 زي أول مرة شوفتك.. بوست إيدك من غير ما تدري..

 زي أول مرة بكتب.. وإنتي أول مرة تقري..

 زي أول كل حاجة.. زي إنك فجأة تبقي ليا كل حاجة..

فوبيا الإرتباط

التوتر في بداية العلاقات والخوف من الفشل -كالمعتاد- بيخلينا أحياناً نخسر أشخاص كان ممكن ومحتمل العلاقة معاهم تنجح وتستمر..

هاجس العلاقات الفاشلة اللي مَرّينا بيها في حياتنا بيوصلنا ان يبقى عندنا "فوبيا من الإرتباط" وأول ما تشوف حد يادوبك بيميل ويحدف منديله كاتب على طرفه تجيله -كما قال العندليب- بيبدأ يحصلك تشنجات وإسهال وودانك تتهز زي فؤاد المهندس في فرافيرو لما كان بيسمع أغنية العتبة جزاز..

وتبدأ تفرش مختبر التحاليل العاطفية الخاص بيك وتحط الضحية تحت الميكروسكوب وتتعامل معاه زي فار التجارب بالضبط..

وتجرب عليه كل المواقف السودوية المهببة والمنيلة بنيلة اللي حصلتلك قبل كده وده للتأكد من حُسن نواياه وصدق مشاعره.. وبيصاحبك سوء الظن الأوفر الدائم مع كل أفعاله..

يعني لو ما اتكلمش مرة كل ساعة يبقى نسيني خلاص.. ولو خرج من غير ما يقول يبقى بيخوني.. ولو اتكلم وهو متعصب شوية يبقى عايز ينهي أم العلاقة ويبعتلي دباديبي..

الملفات السابقة مع كل السابقين بتتفتح قدامك وتبدأ المقارنة المستمرة بين العلاقة دي والمرحومين أخواتها اللي انتهوا بفشل ذريع مع بعض الغرز والخدوش والكدمات.

ومن هنا تبدأ علاقة جديدة في الإنهيار بشكل سريع عن اللي قبلها بسبب خيالاتك المريضة وتوقع الفشل ولما تاخد بالك إن العلاقة خلاص بتقولك باي باي و go to hell بتحاول تنقذ ما يمكن إنقاذه لكن بعد ايه يا شاطر فلقد سبق السيف العذل واللي كان معاك محتاج أصلاً كورس علاج نفسي وإعادة تأهيل بعد اللي عملته فيه وربنا يستر وميبقاش زيك كده ويمشي يعقد في خلق الله..

طبيعي انك تفشل مرة واتنين وتلاتة بس من الغباء انك تفضل تفشل طول عمرك بسبب خوفك من الفشل.. إبدأ العلاقة الجديدة كأنها الأولى في حياتك وإردم بزفت وقطران على كل اللي فات..

*ماتخليش تجاربك أشباح بتطاردك طول الوقت.. خليها تجارب تقدر تستفاد من أخطائها علشان ماتكررهاش تاني..

أطفال ما يملاش عنيهم غير التراب :3

حاجة أول مرة حد يعرفها عني ، أو اني أقولها أصلاً لحد -حتى أهلي..

كنت وأنا في ابتدائي معجب ببنت ومكانتش هي بتكلم حد من الولاد خالص - مش عارف ايه السبب الصراحة في سنها الصغير ده ، ما علينا- وكنت دايماً بحاول أقنع العيال اللي معايا انها ممكن تبقى صاحبتنا -ومن خلال الحكاية دي أقدر أنا أتعرف عليها أكتر ومع الوقت أفكس للعيال وساعتها أقولها اني معجب بيها وكده -لو عرفنا نبهرها في نفس الوقت .. وقلتلهم إن أحسن طريقة لِلَفت انتباها اننا ناكل حشرات قدامها -زي سيمبا وبومبا وتيمون وكده- وبعد محاولات في إقناعهم .. بالفعل في زمايل ليا جابوا حشرات وأكلوا قدام البنت وأنا كنت بعمل نفسي بجمع نمل معاهم وساعة الأكل كنت برميه على أمل انها تستنضفني لما تلاقيني الوحيد اللي مبياكلش نمل في الفصل -مع اني لسه مكنتش عارف اني بالطريقة دي بأخدع الأولاد ولكني كنت أجاهد بإستماتة من أجل التعرف عليها ، ولكن في يوم لقيت واحد صاحبي قاعد معاها وبيلعب لعبة "تعال أقولك حاجة في ودنك" وفجأة مد ايده وراح مأكلها نملة واللي صدمني انها داست معاه في الأكل عادي ..

لحد دلوقتي مش قادر أفهم ايه الدرس المستفاد من القصة دي ! -مع العلم اني حابب أشاركها عادي ..

هل يا ترى انا كنت السبب في وساخة الفصل كله؟

ولا الولد والمدرسة كانوا أوساخ أصلاً؟!

ولا هي الدنيا كده زبالة وكل الأطفال والمراهقين بيعيشوا التجارب دي؟

*اللي حصل مش بالنص ولكن محاولةً لتجميل الموضوع والحدق يفهم*

بواقي ثورة -فرضاً

تخيل معايا انه ولطيلة يومين استطعت فيهم انك تشوف جميع أنواع المشاعر الممكن أن تختلط ببني آدم ، الحزن القهر الغضب السخط العتمة حتى الأمل ..

رأيت مزايدات ، رأيت مشاعر صادقة ، رأيت كل شئ ، شعرت بالضعف وبقهر الرجال ، أحسست كثيراً بالنفاق ، الرغبة في الصراخ والبكاء بأي صورة ..

طوال عمرك تزعم انك تحاول وزن الأمور ، لأول مرة تشعر بالشلل والعجز التام ، في ظرف ساعات يتحول غضبك لشفقة علينا جميعاً .

الذي يحدث ليس بطبيعي لكي ننتظر ردود أفعال طبيعية ، انه ليس بطبيعي أن تقضي نصف يومك الصباحي منتظراً حكماً على أحد زملائك وتقول يارب يتحبس 3 سنين عشان يطلع في الإستئناف.

ليس من الطبيعي أن تنتظر 6 ساعات على قهوة لكي تخطف نظرة على معتقل من شباك سيارة الترحيلات.

ليس من الطبيعي انه ولمدة سنة الناس مش ملاحقة تحط مين ولا مين بدل صورة البروفايل.

مش طبيعي أبداً انك تهرب من عين أم صاحبك عشان مش عارف تواجهها بضعفك وتخاذلك.

مش طبيعي أبداً انك تخش بيتك فـ أمك تقولك مال وشك تقولها أصل الغاز كان أشد من البارح.

لحظات كثيرة كان بيصيبك فيها الغرور وتعتقد أنك متماسك لأبعد الحدود ، لكن فقط أن تتعرى أمام نفسك ، طول العام الفائت كنت بتضحك على نفسك ان صديقك طالع طالع ، الحقيقة انه كان مُسكّن لك لكي تستطيع أن تضحك بدون وجع ضمير.

بدون مزايدات بدون اتهامات ، العجز وحش ، القهر وحش ، الإنسانية درجات وخليني أعترف ان في أحيان كتيرة لما الدم كتر ، بقى المشهد عادي وعادي جداً يمكن عشان منعرفش اللي مات ، يمكن عشان عرفت انك منزوع الآدمية بدرجة من الدرجات ، انت عاجز -انا عاجز.

بكلم الناس عن العقل وتنحية المشاعر جانباً في السياسة ونسيت اننا بشر مش آلة مجموعة من المدخلات والمخرجات !

أنا مش عاوز حد يكلمني عن المصالح والمفاسد والمواءمات وأي حاجة ، لأني مش عارف رد فعلي ممكن يكون ايه.

مشاعر ملخبطة ، أضحك جايز ، أفرح ممكن ، لكن صدقني مفيش أوجع من لحظة وانت حاطط دماغك على سريرك وتحس انك مجرد حيوان مربوط في ساقية ، عاجز حتى انه يشرب لما يعطش ، إلا بإذن صاحب الساقية.

العجز عن الوصول لحل مُر ، لكن الأمَّر هو العجز عن الوصول للحكمة من اللي بيحصل ، صدقني مهما كانت درجة إيمانك هتوصل للحظات كتيرة من اليأس ، لكن المبرر الوحيد بعد كل لحظة يأس انك بتكون شايف وحاسس ان بكرة أحسن طول ما احنا ورا الموضوع ، طول ما احنا مش ناسيين ، طول ما احنا فاكرينهم.

في مصر المحروسة

صحيت من نومك جعان ، جبت الفطار خلاص - كنت لسه هتبدأ تاكل ، تفتكر كلام سيادة المشير :3 وتسأل نفسك قبل ما تفطر (انا اديت ايه لمصر؟)

لقيت نفسك فعلاً ما عملتش لمصر أي حاجة !!!

 يعني يا دوب ، تدي لمصر 20% من قيمة دخلك السنوي ضرايب ، يعني كل 10 جنيه بتشتغل بيهم مصر بتخصم منهم 2 جنيه من المنبع ..

وبعد كده ، مصر بتاخد 10% من قيمة أي سلعة بتشتريها - أياً كانت - وبتقول عليها (ضريبة مبيعات) ، يعني الـ 8 جنيه اللي فاضلين مصر بتاخد منهم كمان جنيه ..

وبعد كده ، مصر بتشوف لو انت هتشتري أي سلعة مستوردة ، وتاخد منك ما بين 5% إلى 65% من سعرها ، وتقول عليهم جمارك ، علشان كده لما بتشتري موبايل بتلاقيه أغلى من سعره في الخليج حوالي 1000 جنيه - دول برضو بيروحوا لمصر - ولو هتشتري بنطلون جينز تركي مصر بتاخد نص الثمن وتركيا بتاخد النص ..

أما لو انت بقيت من أصحاب الثراء الفاحش :v واشتريت عربية ثمنها 100 الف جنيه مثلاً ، مصر بتاخد منهم 65 الف ، والشركة المنتجة بتاخد 35 الف فقط -

يعني كده الـ 7 جنيه اللي فاضلين اتخصم منهم كمان 2 جنيه على الأقل ..

بس مش مشكلة ، انت اشتغلت بـ 10 جنيه - أخدت 5 ومصر أخدت منك 5

المفروض بقى ان بيتقدم لك خدمات بيهم ، زي الأمن والتعليم والصحة ..

بس الحقيقة برضو انك بتقضي سنة أو سنتين أو حتى 3 سنين من عمرك بتدافع عن مصر في الخدمة العسكرية ، مع ان الدول اللي بتاخد من شعبها الفلوس دي كلها ما بيبقاش عندها تجنيد إجباري لانها بتدفع مرتبات محترمة للعسكريين من الضرايب اللي الشعب بيدفعها 

والحقيقة برضو انك بتصرف على التعليم - على الأقل في الدروس الخصوصية - بشكل يجعله لا يَمُت للتعليم المجاني بصله ،

والحقيقة انك لو تعبت مش هتلاقي سرير عناية مركزة في أرجاء المحروسة اللي المفروض بتعالجك بفلوسك ..

بلد بتاخد نص دخلك ، و 5 سنين على الأقل من عمرك ، وما بتقدمش أي خدمات من أي نوع ، وبالرغم من كده بنطلع احنا اللي مش وطنيين ،

لاوم نقطع الرغيف أربع تربع علشان نبقى شعب كويس بيحب مصر ولازم نرفع الدعم عن الغلابة ..

خيال طفلة

 كان فيه بنت حلوة

عاملة شعرها كعكة

والناس بتلاقي في عينها نجوم

كانت مش عارفة تقرا الغيوم

فحطت إيدها على خدها

والهوا الساقع كان بيملِّس على وشها

بس هي كانت حزينة ..

سمعت جواها صوت طفل صغير

بيغني لنجمة انه بيحبها

وعيَّط عشان نفسه يلمسها

ودموعه بلِت روحها

فقشعرت

كانت عمرها ما شافت الطفل

كانت بتحس بيه

زي الجنين

لما بيقوم .. لما بيحزن .. ولما بيضحك

المهم

حست انه قام

و وقف على طراطيف صوابعه

ولمس النجمة وبكى من الفرح ..

حست بنور من جواها

ولقت ولد جاي عليها من بعيد مُبتسم

ساعتها

مابصتش عليه

بس كانت شايفه في وشه النور

وابتسمت أوي .. وعصافيرها زقزقت

عشان عرفت كويس هو مين ..

هو الطفل اللي أخيراً لمس النجمة

و توتة توتة :")

أعراض الإرتباط

أعراض الإرتباط أثناء حلول موسم التزاوج-

بدايةً .. كان عندي صديق من أوائل المرتبطين حديثاً -لاحظت عليه بعض التغيرات وعند ملاحظتي لتلك التغيرات عليه بدأت بتلقيبه بالسيس وأدركت حينها أنى ولابد من إبلاغه بمثل هذه التغيرات التي لوحِظت من قِبَلي و أنني رافض لها .. وبدأت أشعر حينها بأنه عارٌ على أن يكون صَديقٌ لي و أنه خان أصدقائه ، ولكنني استمريت رافضاً لفكرة إضطهادي أو إساءتي لمعاملته كما البعض ، و بمرور الوقت و إرتباط المزيد من الأصدقاء أدركت أنهم كلهم قد تحولوا -فقمت بتجميع ملاحظاتي عليهم وبدأت بتطبيقها على أي صديق يرتبط وغالباً ينطبق عليه ما لايقل عن 70% من هذه الملاحظات والتي أطلقت عليها فيما بعد أعراض الإرتباط ، وهي:- 

(شوية عامية بقى :v)

1- مبدأياً فإن الشاب بيجيب خط محمول جديد ومش بيديه لحد (خط_الهلس) لأن الخط ده هو الخط العاطفي واللي بعد الإرتباط بيبقى هو الخط الأساسي وبالتالي لو حاولت تتصل بيه هـ تلاقي تليفونه مغلق أو غير متاح :3

2- كُل ما تتفقوا على الخروج يقول لك أصلي مشغول .. أصلي عندي حاجات لازم أعملها .. لكنك لو ضغطت عليه علشان تعرف الحاجات دي هـ تلاقيه بيتهرب منك ويلف و يحوّر لحد ما انت تزهق

3- الشاب المرتبط جديد بتلاقي سلوكياته بتتغير يعني شتايمه بتقل ، ألفاظه بتبقى أرقى ، لِبسه ينظف فجأة ، يهتم بملابسه الداخلية من بوكسرات وخلافه وأشكالها وأنواعها وماركاتها

4- لو بعد حين قدرت تجبره على الخروج معاكم فـهو هـ يخرج معاكم بشكل رمزي لأنه هيقضي أغلب الخروجة على جنب بيتكلم في التليفون وعينه بتلمع وإبتسامه تافهة على فمه من الودن للودن مع تراخي عام في المفاصل وكأنه بقى مخلي

5- مؤشر الكذب عنده بيعلى تدريجياً مع أصحابه وأهله وده بعد كل خروجة مع حَبيبهُ

6- تبدأ تظهر عليه بعض السلوكيات اللامؤاخذة شوية يعني كُل ما يشوف طفل يفرح بيه ولما يشوف حاجة رومانسية يسرح ولسان حاله بيقول so cute ^_^

7- بعد الإرتباط بتتحول صورته على الفيس إلى صوابع لابسه دبل وبالتالي لو ليك أصحاب كتير ارتبطوا في نفس الوقت هـ تلاقي نفسك مجرد صديق لصوابع لابسه دبل

8- يبدأ يعمل شير لقلوب ودباديب ويمنشن فيها لِنُصُه التاني

9- كل صورة بعد كدة هـ تلاقيها زي فيلم رومانسي قديم من الستينيات -يعني تلاقيه ماسك إيده وراسم عليها حرف أو عاملين بإيديهم شكل قلب .. قال يعني كل واحد منهم لوحده نُص قلب ومحتاج النُص التاني يكمله (إبتذال)

10- يبدأ يردد كلام غريب ومن معرفتك الوطيدة به بتكون متأكد إن ده مش كلامه إنما كلام الحبيب الفاضل اللي سيطر عليه

لو فكرت أو حسيت في يوم انك عايز ترتبط حاول ما تغيرش من نفسك أو من شخصيتك اللي هي المفروض عاجباك -اللي هيحبك أو هيعجب بيك هيكون بيحبك أو أعجب بيك كُلك على بعضك -عيوبك قبل حلاوتك..

قَرُبت النهاية أم لازلنا في البداية؟!!

كفى بالأبيض ملبساً..

ظل السواد ميتماً -بي..

كما حال خاطري وأفكاري..

شُوِهَّت آثر المفارقة الذهنية التي عصفت بعقلي..

مَيلُ الأحاجي بالأخطار مُبهماً -حَلهُ..

ثقتاً بي جميعهم يتمَنونَ -ورجاءً لأجله يبسطونَ سبيلاً..

يصنعون ويخططون ويحلمون وترى نتيجة فعلهم

كما الفراغ في حقْ نفسي..

متى قَرُبت النهاية وتصبح كل المقاعد خالية!!

متى ينتهي كلٌ منا في دوره!!

متى يُسدل الستار!!

أفكار شخص حزين

عندما تظن أنك حقاً مميز

تذكر كُل من حولك

تذكر ألا تسكب دموعك إلا أمام من تثق أنه سيمسحها بيديه

ولن يتركك إلا وقد أبدلها بإبتسامة على شفتيك

عندما تلمح ذكرياتك تَعصِف بذهنك

تماماً كما لو كنت وحيدٌ بخيالك

 -بحياتك ترى الأشياء قاتمة لونها

ذكرياتٌ تعبث بحالك

ألمٌ دفين ينتظر لحظة الإرتطام

بسطح الحقيقة الصلب

وعندما ترجو الموت -من بعيد هنالك من ينادي

ينادي على شخصٌ عُرِفَ أنه أنتَ

وحيدٌ رغم وجودهم حولك

يَنعَونّكَ في صحيفةِ اليوم و غدا

أتظن بعد كل هذا أنك حقاً مميز؟!

ألم ترى كم لم تُلاحَظ من قبل؟!

ألم تُدرك بعد كم يحتقرك بعضهم

 -و يُسئ إليك قليلهم بالمعاملة؟!

ذُق عذابي وانتظر وَعيدي

يا من ترى حياتي ذو قيمة

يومٌ مُتداخل للأفضل -أتمنى

ما أروع قطرات المطر

بين ورودِ وأوراق الشجر

وقطراتُ الماء تداعبُ عيناها

كذلك بعضها يتحسسُ شفتاها

وَقفتُ حاسداً متوعداً خائفاً

حامداً شاكراً حابباً لها

وإذا بها تتسائل عما إذا كان الطقس مُيتمٌ بها

ترى السماءُ نِصفها مُشمسٌ

ونِصفها الآخر مُعتمٌ -قابِضٌ على سُحبٍ

قيل و وُعِدّ لها إن لم تُنزل مائها

ترى الغيوم مُلبدة كذلك الشمس مُشرقة

كما الرياحُ بالأتربة مُعَبأة

تَعصِفُ على مَن نَبضَ قلبي عِشقاً فيه

كلام وخلاص

طال ليل السكوت

وعهدي ويّا الناس

انخدع بيهم ومنهم وفيهم

ده اللي ظلم يوم

عمره ما راح ينداس

الظلم في الملكوت

والحق عند الموت

منيش ماشي

إلا وكفني على كتافي

أتدرك ماهية الحياة ؟؟؟

الحياة !!

إبتسامة و أمل و دوامة ألم ..

سعادة دائمة و تعاسة عارمة ..

إخلاص و وفاء و غدر و شقاء ..

نتقاسمها مع أحدهم على الرغم من أننا نعيشها مُنعزلين !!

هي نوراً و ظلام ..

هي كلاماً في كلام ..

هي أن تكون برفقة أصدقاء ..

هي أن تظل بالأصدقاء وحيد ..

حيث يكون أصدقائك دائماً معك مُخلصين ..

في حين أنهم أيضاً عنك غافلين ..

كاتب لبكره جواب * Has been tuned :D

كاتب لبكره جواب وخايف ميوصلشِ

خايف لبكره يعدى ومن حلمى مقربشِ

لكنى لازم أكتب وحروفى توصله

برغم كونها أمانى وجايز متحصلشِ

ده أنا راسم لحلمى طريق وخايف ميكملشِ

حاطط فى قلبى باب منه مقربشِ

عليه ألف حارس حالف ميفتحشِ

وحابس فى عينى كلام ليكى متقلشِ

والريح تسأل عنى موج البحر ليه متهدرشِ

يا سفينة رحال لعرض البحر ليه متدخلشِ

ده الإنتظار من نار .. و ع الصبر أنا مقدرشِ

___________________________________

*

مستوحاة من كلمات كاتب لبكره جواب لـ زاب ثروت <3

حُلم ليلة .. ولم يكتمل

حَلِمتُ بها تجوب الآفاق معى فى الفضاء

فوق تلك الأرض، فوق ذلك العشب الأخضر

ووسط الأزهار، أحتَضِنها وأقبلها، أُلَثم

وَجنتيها، شَفَتَيها وعُنقِها وهى سعيدة

فرحة، فَضمتنى إلى صَدرها وبادلتنى القُبلات.

وفى الصباح حين إستيقظت من نومى - فزعاً من

صوت المنبه - كنت سعيداً، إستيقظت وأنا ضامم

لقُبلات حُلمى على صَدرى كَيلا تَسقُط تِلك القُبلات

أو هكذا خُيلَ لى، وعند دخولى الحمام أغلقت

الباب خلفى ووقفت أنظر على مرآة حوض الغسيل

تطلعت إلى وجهى المُبْتَسِم الغَير عابث بالحياة

سوى الحُلم، وقفت قليلاً أتذكر تلك القُبلات

وإذا بى فجأةً أشعر بحزن خفيف، لأنى خَشيت

أنى لو فتحت الصنبور وغسلت وجهى فإن

قُبلات حُلمى ستتساقط فى الحوض، 

تجهم وجهى حزناً وخوفاً،

فخرجتُ - كَما دخلت - دون أن أفتح الصنبور..