كان فيه بنت حلوة
عاملة شعرها كعكة
والناس بتلاقي في عينها نجوم
كانت مش عارفة تقرا الغيوم
فحطت إيدها على خدها
والهوا الساقع كان بيملِّس على وشها
بس هي كانت حزينة ..
سمعت جواها صوت طفل صغير
بيغني لنجمة انه بيحبها
وعيَّط عشان نفسه يلمسها
ودموعه بلِت روحها
فقشعرت
كانت عمرها ما شافت الطفل
كانت بتحس بيه
زي الجنين
لما بيقوم .. لما بيحزن .. ولما بيضحك
المهم
حست انه قام
و وقف على طراطيف صوابعه
ولمس النجمة وبكى من الفرح ..
حست بنور من جواها
ولقت ولد جاي عليها من بعيد مُبتسم
ساعتها
مابصتش عليه
بس كانت شايفه في وشه النور
وابتسمت أوي .. وعصافيرها زقزقت
عشان عرفت كويس هو مين ..
هو الطفل اللي أخيراً لمس النجمة
و توتة توتة :")
ليست هناك تعليقات:
إرسال تعليق
ملحوظة: يمكن لأعضاء المدونة فقط إرسال تعليق.